DemoTirana

foto eT

Parrullë e kohës së fishkëllimës, mbahet ende në këmbë në një nga rrugicat e Tiranës

Tyrbja e Kapllan Pashës, Suvatim apo Restaurim?

Ngjyrosje skenografie? 
Llaç, stuko, apo shtresë mermeri mbi Tyrben? 

Kjo ndërhyrje, është e njëjta bojë me atë që ngjan sot Kulla e Sahatit të Tiranës? 
Apo patinim kundër ujit? 

Shihni shigjetat e kuqe 

fotot: eljan tanini 

Më ktheni 10.000 librat e F-së

Hyrje në dyqanin e tij, vjen erë lëvizjesh nga krahët e fluturave që kanë udhëtuar nga e vërteta te imagjinata. Ato shpesh kur nisin ecjen me vërshime, lëshojnë pluhur. Aty ushqehet, madje sa hyn, e ndjen shijen e thatë të fasuleve me bukën sa ena që mban groshët.

I ka lexuar të gjithë librat që i shet në dyqanin e tij pranë Rrugës Q. Ku janë librat e F-së?! Pse i vjedh shteti? A vidhen 10.000 libra? Po mirë, ja po e them ndryshe: A konfiskohen kaq shumë libra? Qeveria ka paralajmëruar se nuk do të tolerojë asnjë aktivitet tregtar të paformalizuar dhe se do të ndëshkojë çdo biznes që kapet në evazion. Kjo fjali e mësipërme më duket si: Nëse kapen komunistë në shtëpitë tuaja, ata do të… Një perandor, që nuk po na shqitet nga ekrani dhe jeta publike, e shiti dhe e bleu Shqipërinë për Një Euro. Këta të tjerët, po u marrin shqiptarëve edhe atë pak euro që u ka mbetur në xhep nën imazhin e të bërit “Shtet”.

Nuk e vë në dyshim, se ata që e kanë qeverisur këtë vend, të parën vrasje që u kanë bërë shqiptarëve, është shpirti. Kjo vjen nga sipër-poshtë. Kuptohet, andej nga kati i fundit ka joshje me pushtetin, e për hatër të disave që duhet të paguajnë e të bëhen shembuj, kërkohet të dënohen me kërkesa të kota edhe ata më të vegjlit.

Deri diku është një shenjë e mirë, por nuk janë të gjithë njësoj. Shumë firma të mëdha vazhdojnë ende të mos e japin kuponin tatimor, bashkë me këtë rrokullisje, edhe ata që bëjnë të mirat pranë qeverisë, nuk mund të jenë kaq të rregullt. Pse nuk niset nga sipër aksioni i kasave, faturave, burgosjeve, mos shitjes mend se futen në burg berberët, i kapjes së atyre që vazhdojnë e bëjnë kontrabandën e ushqimeve?!

Unë uroj shumë që masat e marra nga qeveria kundër informalitetit të zbatohen nga populli dhe të kontrollohen nga ata, jo si veprimet kundër duhanit. Për këtë të fundit, mjafton të dalësh jashtë unazës së Tiranës, ku anës rrugëve kombëtare dhe qytetase, nëpër bare dhe restorante tymoset duhan në çdo orë.

Në rrugën Q këtu në Tiranë, F është ai që unë blej libra shpeshherë. Disa kohë më parë, tatimorët i kanë marrë rreth dhjetë mijë libra. Ashtu siç bënë edhe me atë zotërinë tjetër pas ish-Ministrisë së Kulturës që rregullon biçikleta, duke i vjedhur mallin, por edhe mjetet e punës.

F është një trup i vogël, 10.000 libra janë çerekjete mbi lexime. Në librarinë e tij mblidheshin të rinj nga Elbasani, Durrësi, Librazhdi dhe porosi që vinin nga konviktorët. Unë vetë kam shkëmbyer në këtë shenjtëri disa libra me të tjerë që F m’i ruante me vrull. Kështu vepronte me të gjithë. Kjo puna e librave të F-së, më ngjall një kohë të shkuar shtëpie. Kur komunistët erdhën në pushtet, ata konfiskuan edhe libra nga vilat borgjeze! Gjyshi punonte për një kohë të gjatë në Komitetin Ekzekutiv. Xhaxhai më ka thënë se ai sillte në shtëpi libra të vjetër, me çështje dhe erë të çuditshme, madje edhe me vula familjare. Gjyshi i shpëtonte ato libra prej vdekjes në kaldajën e institucionit, duke i hequr nga radha që shtrëngonte hiç mos gjë! I donte nga qëndrimi i vdekjes në kampin e pritjes. Unë nuk e di dhe nuk e kam kuptuar kurrë: Si mund t’i merren librat dikujt që i ka mbledhur ato ndër vite, që jeton me to dhe mbi to?! Që ushqehet me atë pak dyqan, që e ka punën e vetme, ku për ne të tjerët ishte garancia e pastër e lumturisë personale?! Kush na garanton se ato libra do të kthehen sërish ashtu siç ishin, pa u flakur dhe përfunduar në cepat e ndonjë magazine? Mbase vendosen për mobilie letre në ndonjë shtëpi drejtuesish shtetërorë? Mbase në dhomën e vetë atyre që na bëjnë në ekran moralizma ekonomie! Makina Tatimore, mezi i mbante kur erdhën dhe e vodhën shtetërisht F. Disa i kthyen, disa i lanë po aty, se nuk kishte më vend në maunen qeveritare.

Për mua, libri është shpirti që na takon të gjithëve, nuk mund të merret dhe as të privatizohet. Kur në mes të Tiranës, as pesë minuta larg nga Qendra, mos vallë shteti në këtë rast luan me realitetin e famshëm se libri vidhet dhe nuk kthehet më?!

Eljan Tanini, Gazeta Mapo 23 Prill 2016

Kulla e Sahatit, apo një Sapun Duru?!

Gëzuar Ditën Ndërkombëtare të Monumenteve me restaurime skandaloze.

Tani Kulla e Sahatit duket si Sapun Duru, si alabastër, si pambuk, si plastikë e ndriçuar keq. Ose si një material i lehtë për kuzhinën tuaj, për shfaqjen e skenografisë së rradhës.

Nuk besoj të jetë e vërtetë! Mbase është një reklamë kombëtare për sapunët. 

Me pak mundësi, është një nismë private nga ajo firma hidrosanitare! 

Nga poshtë varja, nga ballkoni e sipër turbo-folk.

Humbi edhe San i Marco i Tiranës, me të njëjtën arrogancë vesesh së propagandës intelektualiste biçim qytetare! Nderkohë, mozaiku i Muzeut Historik Kombëtar po copëtohet çdo ditë. Kjo quhet: Rigonato, ose fënd me rigon.

Liqeni

Si ishte një nga hyrjet në Parkun e Liqenit, ose pallat mbathjesh të kuqe me dantellë prej betoni

EDHE IBRAHIM KODRËN E DHATË ME KONCESION?

Kanë harruar të flasin për punën e tij 60-vjeçare. Sa keq më vjen për ne! Në vend që të krijojmë gjendje shpirtërore dhe të mbrojmë kujtesën e përbashkët nga ata që flasin për çdo gjë e deri te mjeshtrit e heshtjes, ne harrojmë të mendojmë përfitimin pozitiv prej asaj që është e jona: piktura e tij. E zhvarrosën Ibrahim Kodrën për teka tipash me dhe pa taka. Kjo tregon aspak respektin që ne kemi ndaj vdekjes! Ndoshta kështu kemi qenë gjithmonë! Tani po i krijojnë një varr krenar të Kodrat e Liqenit Artificial për të respektuar mbase një përfitim prej atij që nuk është më. Se nuk mjafton ajo që na ka lënë pas, por duhet të merren edhe me lëvizjen e eshtrave. Mbase me varrin e ri të Ibrahim Kodrës po përfitojnë ata që mbajnë veprat e trashëguara prej mjeshtrit. Si fillim po bëjnë në publik një debat të madh, dhe ne fund të ditës pa natë, emri i tij është folur kaq shumë, sa atyre u rritet vlera e veprave dhe veprimi i radhës mes një grupi të ngushtë. Shihni kur të shpallin një ankand të madh, pas gjithë kësaj situate qe u krijua duke lartësuar me dhunë respektin e tanishëm intelektualist ndaj Ibrahim Kodrës.

Edhe në muze po tregohet shumë keq Ibrahim Kodra. Të paktën mjeshtri nuk është vetëm në sjelljet tona të shëmtuara si ndaj Skënderbeut, Ismail Qemalit, Nënë Terezës etj… Kushedi se çfarë do të bënte mbase edhe me dhunë ndonjë shtet fqinj pranë nesh, po të kishin një artist si Kodra. Mbase ata do të krijonin një super fasadë aspak të vërtetë me një shërbim perfekt ndaj figurës së tij. Ndërsa ne që i kemi faktet dhe dedikimet, bëjmë asgjë! Eshtrat e Ibrahim Kodrës nuk janë ankand politik që të jepen me koncesion! Kthej kokën nga një hapësirë varrezash aspak interesante! Debati për maestron ngjan i shëmtuar, merren me kodra, fshatra apo merita dhe jo me vepra të plota ndaj nesh dhe tij. Mund edhe të themi që tani: Parku i Liqenit dhe i Varrezave. Pse po kthehet Liqeni Artificial në një varrezë me njerëz të rëndësishëm? Pse duhet të mblidhen ata që ikën nga kjo botë në një vend pranë qendrës? Po, ka edhe shumë të tjerë që janë të dëgjuar në historinë tonë, por ne nuk i kemi varrosur atje. Mbase kanë një plan të shtohen etërit tanë në atë kodër! Të zhvarrosen, çfarë presim ende?!

Ne mund ta kishim bërë mjeshtrin e madh simbol kombëtar. Duke filluar nga zyrat e shtetit e deri te dyqanet që mund të tregtonin në forma të ndryshme imazhet kombëtare të Kodrës përmes një marke të vetme. Mbase vetë qeveria e tanishme mund ta kthente pikturën e Ibrahim Kodrës në dhurata ndërkombëtarësh. Nuk thashë në joshje artistike apo turistike! Ishmi u shua përfundimisht si një vend shpirtëror, ashtu siç edhe varri i Konicës pranë vëllezërve Frashëri, duke na dhënë rëndësi totalisht të kundërta. Ne nuk bëmë asnjë muze për të, në mos muze, diçka që jetohet nga të gjithë në lidhje me artin pamor. Ibrahim Kodrës i vendosëm në qendër të Tiranës një vepër të kopjuar keq! Si gjithmonë, ne nuk marrim vesh nga veprat artit në park. E kam vizituar për herë të parë Ishmin vetëm prej piktorit. Kisha interes të shihja diçka tjetër në atë varr mbi kodër. A u bë ndonjë gjë më shumë përveç një betoni pak interesant? Jo, sepse Kryeministri ynë i tanishëm është piktor, ai do vetëm artin e tij.

Nuk bën më aspak habi fakti i nënshtrimit të shtetit me rregullat tona. Një ditë çohen dy njerëz dhe kërkojnë një zhvarrim! Mos vallë e kanë kërcënuar shtetin tonë dy njerëz me pasurinë e trashëguar të Ibrahim Kodrës? Brenda të gjitha amaneteve eshtrat e mjeshtrit varrosen atje ku duan të gjallët. Por a do të bëhet diçka më shumë pas këtij kompromisi publik? Mjeshtër, shpirti yt jeton në cepat e ngjyrave.

Eljan Tanini 

Gazeta Shqio 11 Shkurt 2016 

Kundër Digave

Me Natyrën kush e kruan, Vuan

Gëzuar 21 Janarin!

Vrasës quhet ai që i nxori në bulevard, ai që i vrau, por edhe ai që u bë shkak për ta. 

Do më bëni të 3 një pikturë për 21 Janarin?!  

I thoni perandorit se mund të pikturohet shumë mirë në zyrën e tij, unë e kam parë. Ai e pëlqen edhe Ibrahim Kodrën! Ngjyrat dhe drekën, paguhen nga tullumbaci i shfryrë! Pastaj pikturën e mbaron xhirafa me të tre në zyrën e tij. Andej nga fundi, sërish xhirafa, ka për ta shfaqur pikturën, aty në hollin e katit të parë të shtëpisë së popullit! Mbase ai bën edhe nje seri kollaresh për dhurata ndërkombëtare! Gëzuar 21 Janarin! 

Jo vetëm sa herë që e kujtoni 21 Janarin me Lacrimosa, por gjithmonë torta ime e prishur është gati. Ta gjuash atë ne kokat e këtyre që na qeverisin dhe të atyre që ishin, është të thuash: Gëzuar edhe 21 Janarin! 

Eljan Tanini

21 Janar 2016

501 leje për ndërtim digash

501 lejet për ndërtim digash që janë dhënë në Shqipëri, do ta kthejnë vendin në një tokë me diga, sepse lumenjtë tanë do të kenë të paktën 80 të tilla.

I vetmi lumë që nuk do të ketë diga, është Lana. 

Digat jo vetëm që do të shkatërrojnë ekosisteme të pakthyeshme, do të zhdukin përfundimisht troftat dhe ngjalat nga lumenjtë shqiptarë, por do të detyrojnë me dhjetëra mijëra banorë të lenë fshatrat e tyre, pasi uji do të privatizohet nga ata që kanë marrë liçencën për digat. 

E gjithë kjo batërdi, nis me përfitime me vetëm 2% të PBB-së, kur turizmi sjell dhjetëfish më shumë përfitime si shkallë PBB-je.

Shumë nga këto diga po ndërtohen e do të ndërtohen në parqe kombëtare dhe në zona ku turizmi ka filluar ose është zhvilluar.

Mbytja e kanioneve, është fillimi për zhvillimin e turizmit në brendësi të vendit.

Burimi: Instituti i Politikave Mjedisore

foto 1, Ujëvara e Peshtures

foto 2, Nivica 

Fotot, Fation Plaku 

Jepet me qira

Jepet me Qira, boll pasuri kanë shitur nga vendi im.
 Kush afrohet i pari?! Ankandi nisi.
16 Qershor 2011. Foto nga protesta Rinia në Indinjatë para Zyrave të Kuvendit